19mh linn / Iain MacIlleathain

Bàrdachd - Do Thighearna Òg Chola

Dàn 3

Bha Tighearna Chola aig an àm seo a' ceannach air ais pàirtean den talamh a bha a shinnsireachd air a chall ri na Caimbeulaich: ged a tha e fhèin a-nise ann an Canada, tha am bàrd a' cur fàilte air an sin ann an grunn dhàin. Anns an dàn seo tha e a' cur a dhùrachdan gu mac an Tighearna a tha air ùr phòsadh, a' toirt comhairle dha, mar a bhàrd-cinnidh, gun e a bhith a' dèanamh ana-caitheamh air a' chuid airgid anns na bailtean mòra mar a bha cuid de na h-uachdarain òga eile a' dèanamh (rud a thàinig gu ceann anns na Fuadaichean).


'S e eisimpleir mhath a tha seo de chuideigin ga ghiùlain fhèin mar bhàrd-cinnidh fad às dèidh dhan ghnè bàrdachd sin a dhol à fasan agus, nas annasaiche buileach, ga dhèanamh o thaobh thall a' chuain!


Do Thighearna Òg Chola

  • Saoghal fada le buaidh dha
  • 'S don a' chèile sin fhuair e air làimh;
  • Gun robh 'n t-Àrd-Rìgh mar dhìon dha
  • 'S a cur chomhairlean crìonnta na cheann.
  • Tha e 'n dràst' ann an Lunnainn,
  • Is ma thèid e gun fhuireach don Fhraing,
  • Guma sàbhailt' a thuras
  • Ann an àirde 's an urram gun taing.
  • B' i mo chomhairle ghràidh dha,
  • Mas e duin' e nì tàmh am measg Ghall,
  • E bhith fuathach air dòighean
  • Cuid de dh'uachdarain òg' tha dol ann:
  • Bidh iad amaideach gòrach,
  • A' sìor chluich an cuid òir 's a' cur gheall –
  • 'S furast' storas a ghleidheadh
  • Seach a bhuannachd an deaghaidh a chall.
  • Fhir a dh'ùraich na facail s',
  • Bi cuimhneach le beachd air mo rann,
  • 'S air na daoine bha romhad,
  • A rinn feum anns gach gnothach a bh' ann;
  • Chùm iad ac' an cuid fearainn
  • 'S rinn iad fhuasgladh an carraid nan lann
  • Bhiodh an sliochd ann gu buadhach
  • Fhad 's bhios duilleach a' gluasad air crann.

Do Thighearna Òg Chola

Tagh na facail a th' air an comharrachadh ann an dearg airson mìneachadh fhaighinn.


The Adobe Flash player and Javascript are required in order to view a video which appears on this page. You may wish to download the Adobe Flash player.

Teacsa

Rinn e ochd pìosan bàrdachd air Tighearna Chola

Rinn e ochd pìosan bàrdachd air Tighearna Chola fhèin, sin Alasdair Ruadh mar a bh' aig na Gàidheil air an còigeamh Tighearna Chola, agus bha oighre aige. Agus nuair a phòs e, rinn e pìos bàrdachd air, agus aon phìos bàrdachd eile air an oighre. Tha e car inntinneach, tha e soilleir nuair a leughas tu na pìosan bàrdachd a rinneadh air oighre Alasdair Ruaidh nach robh Bàrd Thighearna Chola cho buileach cinnteach am biodh an t-oighre a cheart cho taiceil dhan an t-sluagh, agus am biodh e cheart cho taiceil dhan a' chultar 's a bha Tighearna Chola fhèin. Ged 's e bàrdachd molaidh a bh' as an dà phìos bàrdachd, tha rabhadh beag air siud 's an seo ag èirigh.

Dàin Eile

Leugh dàin eile a sgrìobh Iain MacIlleathain

Air adhart gu

Beachdan

Stiùireadh a’ BhBC

BBC © 2014 Chan eil uallach air a' BhBC airson na th' air làraich-lìn eile.

Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.