Am Bàrd

Cha do thòisich Aonghas Dubh, mar as fheàrr a dh'aithnichear e, a' sgrìobhadh bàrdachd ann an Gàidhlig gus an robh e 25 ged a bha e air a bhith ag amas air bàrdachd sa Bheurla a sgrìobhadh grunn bhliadhnaichean ron sin.

Bhon uair sin tha e air cliù a chosnadh dha fhèin mar sgrìobhadair eadar-nàiseanta ag aithris a chuid bhàrdachd ann an dùthchannan cho fad às ri Iapan, Ameireaga, Fionnlainn is Iosarail. Tha e cuideachd air tòrr obair a dhèanamh am measg inbhich agus sgoilearan gam brosnachadh gu bhith ri bàrdachd, gu h-àraidh ann an Dùn Phris is Gall-Ghàidhealaibh far an deach leabhar fhoillseachdh le cruinneachadh den obair a rinn e-fhèin 's na sgoilearan san sgìre.

Tha Aonghas a' dèanamh a bheòshlaint bho bhith a' sgrìobhadh ann an iomadh seagh: bàrdachd, òrain, scriobtaichean rèidio, telebhisean, taigh-cluiche, film agus fiù's opara. B' e aon de na sgrìobhadairean a bh' air am film cliùiteach Seachd a thàinig a-mach ann an 2007 agus tha e air dà libretto a sgrìobhadh, An Turas agus Sgathach. Tha e air grunn leabhraichean fhoillseachadh leis an leabhar as ùire, laoidh an donais òig a' nochdadh ann an 2007.

Tha e air iomadh duais a chosnadh, nam measg Crùn a' Chomuinn Ghàidhealaich aig Mòd Pheairt ann an 2004 agus Duais Stakis airson Sgrìobhadair na Bliadhna ann an 1997.

Tha e pòsta aig a' chleasaiche 's an sgrìobaiche ainmeil Gerda Stevenson. Tha dithis chloinne aca agus tha an dachaigh an-diugh ann an Siorrachd nam Puballan.